Kosovo Police ka arrestuar katër persona të dyshuar për mashtrim dhe falsifikim dokumentesh, pas një operacioni të zhvilluar nga hetuesit e Drejtorisë për Hetimin e Krimeve Ekonomike dhe Korrupsionit (DHKEK) në Prishtinë.
Sipas njoftimit zyrtar, të dyshuarit me inicialet M.M., Sh.B., D.R. dhe B.Zh. dyshohet se kanë përdorur dokumente të falsifikuara – përfshirë pasaportë të Serbisë dhe dokumente të tjera – si dhe kanë prezantuar një person të rremë si pronar të ligjshëm, me qëllim shitjen e një prone në sipërfaqe prej 36.28 ari, në pronësi të ankuesit M.T.
Në këtë mënyrë, ata dyshohet se kanë mashtruar blerësin H.M., duke e bindur se prona po shitej me dokumentacion të rregullt, ndërsa në këmbim kanë përfituar një shumë totale prej 1,578,180 eurosh.
Me urdhër të prokurorit, janë realizuar kontrolle në pesë lokacione të ndryshme, ku si prova materiale janë sekuestruar 9 mijë euro.
Të dyshuarit përballen me akuzat për:
-
“Mashtrim” (neni 323 i KPRK-së),
-
“Falsifikim dokumentesh” (neni 390 i KPRK-së),
-
“Legalizim të përmbajtjes së rreme” (neni 395 i KPRK-së).
Pas intervistimit në prani të avokatëve mbrojtës dhe konsultës me prokurorin e rastit nga Prokuroria Themelore në Prishtinë, Departamenti i Përgjithshëm, të katër të dyshuarve u është caktuar masa e ndalimit prej 48 orësh, ndërsa hetimet lidhur me rastin po vazhdojnë.
