Prokuroria Speciale e Republikës së Kosovës ka njoftuar për sekuestrimin e pasurisë në vlerë mbi 2.2 milionë euro në kuadër të hetimeve për rastin e koduar “Mati”. Ky rast, i cili është në fazën aktive të hetimeve dhe nën mbikëqyrjen e ngushtë të prokurorit të çështjes, lidhet me veprën penale të shpëlarjes së parasë.
Hetimet kanë sjellë sekuestrimin e një numri të madh njësish banesore dhe pasurish të tjera në emër të njërit prej të dyshuarve, Sh.C. Konkretisht, janë konfiskuar 20 njësi banesore me një sipërfaqe totale prej 1,788.41 m², me një vlerë të përafërt tregu prej 1,788,410 euro; 2 lokale afariste me një vlerë rreth 335,080 euro; 17 vendparkime në vlerë prej 145,176 euro dhe 6 depo me vlerë rreth 17,388 euro.
Totali i pasurisë së sekuestruar deri më tani kap shumën e 2,286,054 eurove.
Ngjarja lidhet me arrestimet që ndodhën në muajin shtator të vitit të kaluar, ku u ndaluan tre persona: Viladan Cakolli, Shefqet Cakolli dhe Edvan Cakolli. Të tre ata dyshohen për përfshirje në veprimtari kriminale të pastrimit të parave.
Prokuroria ka bërë të ditur se hetimet po vazhdojnë dhe publiku do të njoftohet për zhvillimet e reja në kohë reale.
