Procesi i rinumërimit të fletëvotimeve në Qendrën e Numërimit dhe Rezultateve po vazhdon, sipas vendimit të marrë nga Komisioni Qendror i Zgjedhjeve për një numër të caktuar vendvotimesh.
Sipas të dhënave më të fundit të publikuara nga KQZ, deri tani janë rinumëruar mbi 55.65 për qind e votave. Rezultatet e deritanishme tregojnë se Lëvizja Vetëvendosje vazhdon të kryesojë me 46.81 për qind të votave.
Në vendin e dytë renditet Partia Demokratike e Kosovës me 22.05 për qind, ndërsa e treta vjen Lidhja Demokratike e Kosovës me 10.48 për qind të votave.
Pas tyre pozicionohet Aleanca për Ardhmërinë e Kosovës, e cila ka marrë 5.92 për qind të votave të rinumëruara deri më tani.
Njëkohësisht, KQZ ka njoftuar se procesi i rinumërimit është përmbyllur plotësisht në 21 komuna, ndërsa puna po vazhdon në komunat e mbetura. Zyrtarët e KQZ-së kanë theksuar se synimi mbetet përfundimi sa më i shpejtë i rinumërimit, në mënyrë që të procedohet me hapat e tjerë ligjorë drejt shpalljes dhe certifikimit të rezultateve përfundimtare të zgjedhjeve.
