Mbretëria e Bashkuar ka nisur programin e parë në botë për vaksinimin kundër gonorresë, në një përpjekje për të frenuar përhapjen e infeksionit seksualisht të transmetueshëm që po tregon rritje shqetësuese të rezistencës ndaj trajtimeve me antibiotikë.
Shërbimi Shëndetësor Kombëtar (NHS) ka filluar sot shpërndarjen falas të vaksinës në klinikat e shëndetit seksual në të gjithë Anglinë. Fushata synon grupet më të rrezikuara, si pjesë e strategjisë për të ndalur përhapjen e gonorresë dhe për të mbrojtur shëndetin publik nga një kërcënim në rritje.
Rekord i ri i infektimeve në 2023
Vendimi për këtë iniciativë vjen pas një rritjeje dramatike të rasteve të gonorresë në Mbretërinë e Bashkuar. Vetëm në vitin 2023 u raportuan mbi 85,000 raste, shifra më e lartë që nga viti 1918, kur nisi regjistrimi zyrtar i rasteve. Kjo paraqet një trefishim të infektimeve krahasuar me vitin 2012.
Fushata e vaksinimit: Kush përfitojnë?
Sipas autoriteteve shëndetësore, vaksinimi do të ofrohet për personat më të ekspozuar ndaj rrezikut të infektimit me gonorre — kryesisht burrat që kryejnë marrëdhënie seksuale me burra, veçanërisht ata që kanë pasur partnerë të shumtë seksualë ose janë diagnostikuar me ndonjë IST bakterial në 12 muajt e fundit.
Vaksina që po përdoret është 4CMenB, e cila zakonisht jepet për të mbrojtur kundër meningokokut B, por që ka treguar efektivitet të moderuar edhe kundër gonorresë, me ulje të rrezikut deri në 42%, sipas studimeve.
Zyrtarët britanikë: Një moment historik në shëndetin publik
Ministrja për Shëndetin Publik dhe Parandalimin, Ashley Dalton, e cilësoi fushatën si një moment kyç:
“Ky është programi i parë në botë për vaksinimin kundër gonorresë. Ai do të ndihmojë jo vetëm në frenimin e përhapjes së infeksionit, por edhe në përballimin e rezistencës gjithnjë në rritje ndaj antibiotikëve.”
Dalton u bëri thirrje të gjithë personave të kualifikuar të vaksinohen:
“Kjo vaksinë do të mbrojë jo vetëm individët, por edhe partnerët e tyre seksualë dhe komunitetin më gjerë.”
Ndërkohë, Dr. Sema Mandal, epidemiologe në Agjencinë e Sigurisë Shëndetësore të MB-së, theksoi rëndësinë e këtij hapi:
“Vaksina do të ofrojë mbrojtje të rëndësishme për ata që janë më të rrezikuar. Mbretëria e Bashkuar po udhëheq në luftën globale kundër IST-ve rezistente ndaj ilaçeve.”
Vaksina kundër gonorresë, pjesë e një qasjeje më të gjerë
Vaksina kundër gonorresë do të ofrohet paralelisht me vaksina të tjera të rëndësishme në klinikat e shëndetit seksual, përfshirë ato kundër mpox (lia e majmunit), HPV-së, si dhe hepatitit A dhe B.
Objektivi: 100,000 raste të parandaluara dhe miliona paund të kursyera
Sipas një studimi të Imperial College London, programi mund të parandalojë deri në 100,000 raste të gonorresë gjatë dekadës së ardhshme, duke kursyer më shumë se 7.9 milionë paund për NHS-në në shpenzime të kujdesit shëndetësor.
Autoritetet thonë se reduktimi i infeksioneve do të ndihmojë në uljen e përdorimit të antibiotikëve dhe në parandalimin e përhapjes së formave më rezistente të sëmundjes.
