Mbretëria e Bashkuar ka vendosur të pezullojë zyrtarisht bisedimet për një marrëveshje të re tregtare me Izraelin, në përgjigje të bllokadës së vazhdueshme të Gazës dhe krizës humanitare që po thellohet çdo ditë më shumë. Vendimi u bë i ditur sot nga Sekretari i Jashtëm britanik, David Lammy, i cili e cilësoi situatën në Gaza si “të tmerrshme” dhe bllokadën si një akt “mizor”.
Duke folur në Parlamentin britanik, Lammy deklaroi se “kërcënimi i urisë po i kanoset qindra mijëra civilëve”, duke iu referuar të dhënave të fundit të Organizatës Botërore të Shëndetësisë, sipas së cilave mbi dy milionë njerëz në Gaza po përballen me mungesë të theksuar ushqimi. Ai konfirmoi gjithashtu se ambasadorja izraelite në Londër, Tzipi Hotovely, është thirrur për konsultime në Ministrinë e Jashtme britanike.
“Bllokada 11-javore që ndalon ndihmën humanitare është moralisht e gabuar dhe e pajustifikueshme. Është një veprim që po e izolon Izraelin nga miqtë e tij dhe po dëmton imazhin e tij në mbarë botën,” tha Lammy.
Në një deklaratë të fuqishme, ai theksoi se “më pak se dhjetë kamionë me ndihma kanë hyrë në Gaza dje” dhe kritikoi ashpër vendimin e kryeministrit izraelit Benjamin Netanyahu për të kufizuar dërgimin e ushqimeve dhe ndihmave.
Lammy u bëri thirrje deputetëve të dënojnë “refuzimin e qeverisë izraelite për t’u siguruar ushqim fëmijëve të uritur”, duke e quajtur këtë veprim “të neveritshëm dhe të pajustifikueshëm”. Ai shtoi se “kjo nuk është një shpërblim për Hamasin, por një mbrojtje minimale e të drejtave themelore të civilëve”.
Kjo është hera e parë që Mbretëria e Bashkuar merr një hap kaq të qartë diplomatik në raport me Izraelin që nga fillimi i konfliktit në Gaza. Analistët ndërkombëtarë e shohin këtë vendim si një sinjal të fortë politik për domosdoshmërinë e ndaljes së bllokadës dhe adresimit të emergjencës humanitare në rajon.
