Në seancën e radhës në Dhomat e Specializuara të Kosovës, avokati mbrojtës i Hashim Thaçi, Luka Mišetić, ka kundërshtuar pretendimet e Zyrës së Prokurorit të Specializuar (ZPS) lidhur me rolin e ish-presidentit në raport me Lidhjen Demokratike të Kosovës.
Sipas Mišetić, Prokuroria nuk ka paraqitur asnjë provë konkrete që Lidhja Demokratike e Kosovës (LDK) e ka bojkotuar qeverinë e përkohshme për shkak të keqtrajtimeve të pretenduara nga Thaçi apo persona të tjerë.
“ZPS-ja nuk citon asnjë provë të asaj kohe, as ndonjë qëndrim zyrtar të LDK-së që ta mbështesë këtë pretendim”, tha ai para trupit gjykues.
Madje, sipas mbrojtjes, ekzistojnë prova që bojkoti i LDK-së lidhej me mosmarrëveshje politike rreth ndarjes së posteve në qeverinë e përkohshme, e jo me çështje të keqtrajtimeve.
“Zotëri Thaçi ka qenë gjithëpërfshirës”, shtoi avokati, duke theksuar se narrativa e paraqitur nga Prokuroria nuk mbështetet në dokumentacion të kohës.
Këto deklarime vijnë në kuadër të fazës përmbyllëse të procesit, ku palët po përmbledhin argumentet e tyre para se çështja të kalojë në vendimmarrje nga trupi gjykues.
