Kryetari i Komunës së Prishtinës, Përparim Rama, ka njoftuar sot ndërmarrjen e një aksioni konkret për lirimin e hapësirave publike të uzurpuara në kryeqytet. Aksioni ka përfshirë mbylljen e disa parkingjeve ilegale që, sipas tij, për vite me radhë kanë bllokuar lëvizjen e lirë të qytetarëve në rrugë dhe trotuare.
“Po ua kthejmë qytetarëve hapësirat publike! Çdo hapësirë e uzurpuar po lirohet, në mënyrë që qytetarët të kenë qasje të lirë dhe të shfrytëzojnë të drejtën e tyre në qytetin e tyre,” shkroi Rama në një postim në rrjetet sociale.
Në aksionin e sotëm, i cili është zhvilluar nën mbikëqyrjen e Inspektoratit të Kryeqytetit, janë mbyllur disa zona të përdorura si parkingje pa leje, duke u cilësuar si barriera për lëvizjen e lirë të qytetarëve.
Kryetari Rama theksoi se qytetari mbetet prioriteti kryesor i qeverisjes lokale dhe se ky është vetëm një nga hapat në kuadër të një plani më të gjerë për kthimin e qytetit në shërbim të banorëve të tij.
“Qytetari është prioriteti ynë,” përfundoi ai.
Aksioni pritet të vazhdojë edhe në ditët në vijim, me qëllim krijimin e një mjedisi më të sigurt, më të qasshëm dhe më të jetueshëm për të gjithë qytetarët e Prishtinës.
