Disa segmente rrugore në Kosovë do të jenë të mbyllura përkohësisht edhe këtë të shtunë, për shkak të mbajtjes së garave çiklistike në kuadër të Kampionatit të Kosovës, të organizuar nga Federata e Çiklizmit të Kosovës.
Sipas njoftimit zyrtar, mbylljet do të zgjasin nga ora 09:00 deri në 16:00, duke përfshirë:
-
Autostradën “Arbën Xhaferi” në relacionin hyrje/dalja Bibaj – Babush – Lipjan – Prishtinë (Uglar) – Bresje – rruga nacionale N9 deri në Gjergjicë.
-
Një segment të autostradës “Ibrahim Rugova”, konkretisht relacionin Malishevë – Duhël dhe anasjelltas.
Këto kufizime në qarkullim janë vendosur me qëllim të garantimit të sigurisë së garuesve dhe pjesëmarrësve në trafik, dhe janë vazhdimësi e masave që ishin zbatuar edhe të premten.
Kampionati i Kosovës në Çiklizëm, aktiviteti më i madh i këtij viti në këtë sport, po zhvillohet në disa etapa, duke mbledhur garues nga e gjithë Kosova. Organizatorët kërkojnë mirëkuptimin e qytetarëve për këto ndërprerje të përkohshme në qarkullim.
