Sot ka përfunduar afati ligjor për paraqitjen e ankesave në Paneli Zgjedhor për Ankesa dhe Parashtresa (PZAP), lidhur me publikimin e rezultateve përfundimtare të zgjedhjeve parlamentare nga Komisioni Qendror i Zgjedhjeve (KQZ).
Në një përgjigje për Indeksonline, PZAP ka bërë të ditur se ka pranuar gjithsej shtatë (7) ankesa, të cilat lidhen me vendimet dhe procesin e shpalljes së rezultateve përfundimtare.
Sipas Panelit Zgjedhor, për secilën nga ankesat e dorëzuara do të vendoset brenda afatit ligjor prej 96 orësh, nga data e parashtrimit të secilës ankesë.
“Paneli Zgjedhor për Ankesa dhe Parashtresa (PZAP) ka pranuar shtatë (7) ankesa lidhur me publikimin e rezultatit përfundimtar nga Komisioni Qendror i Zgjedhjeve (KQZ). Për të gjitha ankesat e pranuara, PZAP do të vendosë brenda afatit ligjor prej nëntëdhjetë e gjashtë (96) orësh nga data e parashtrimit të secilës ankesë”, thuhet në përgjigjen e PZAP-së.
Kush ka parashtruar ankesa?
Sipas të dhënave zyrtare, ankesat janë dorëzuar nga:
-
Lista Serbe – ankesë ndaj vendimit të KQZ-së për publikimin e rezultateve;
-
Nova Demokratska Stranka (NDS) – dy ankesa për parregullsi gjatë procesit të votimit;
-
Koalicioni PAI–PDAK–LPB – ankesë për parregullsi me fletëvotime;
-
Bekim Haxhiu – dy ankesa, njëra lidhur me shpërndarjen e ulëseve në Kuvend dhe tjetra për parregullsi gjatë numërimit të votave me postë;
-
Partia Rome e Bashkuar e Kosovës (PREBK) – ankesë për parregullsi gjatë procesit të votimit.
Vendimet e PZAP-së do të jenë përcaktuese për hapat e mëtejmë të procesit zgjedhor, ndërsa palët e pakënaqura me vendimet e Panelit kanë të drejtë ankese edhe në Gjykatën Supreme, brenda afateve ligjore.
