Kryetari i LDK-së, Lumir Abdixhiku, ka lëshuar sot një thirrje të fortë dhe emocionale drejtuar mërgatës, duke kërkuar mobilizimin e plotë më 28 dhjetor, ditën e zgjedhjeve.
Në një mesazh publik, Abdixhiku u bëri thirrje qytetarëve të kthehen në Kosovë “me avionë, autobusë, vetura e madje edhe në këmbë”, në mënyrë që – siç tha ai – “ta shpëtojmë Kosovën atë ditë”.
Sipas tij, Kosova ka nevojë për secilin votues, për shpresë dhe për një orientim të ri politik.
“LDK ju thërret! LDK ju pret!”, shkroi Abdixhiku, duke e shoqëruar mesazhin me hashtagun e fushatës #LDK123.
Thirrja e tij vjen në kulmin e mobilizimit të diasporës për zgjedhjet e parakohshme parlamentare, ku pjesëmarrja nga jashtë vendit pritet të luajë rol vendimtar.