Partia Demokratike e Kosovës (PDK) ka rizgjedhur sot Memli Krasniqin si kryetar të saj në Konventën e 11-të të Përgjithshme, e mbajtur në Prishtinë. Krasniqi do të vazhdojë mandatin e tij si udhëheqës i kësaj force politike, me synimin e qartë për ta rikthyer PDK-në në qendër të skenës politike kosovare.
Në një fjalim emocionues para delegatëve, Krasniqi falënderoi strukturat partiake për besimin dhe mbështetjen e vazhdueshme, duke rikujtuar rrugëtimin e tij në këtë parti që nga viti 2004.
“Faleminderit shumë për besimin, për mbështetjen dhe për përgjegjësinë më të madhe jetësore që ma dhatë edhe sot. Kur iu bashkova PDK-së në pranverën e vitit 2004, nuk e kam ëndërruar e as pasur ambicie që një ditë të bëhem kryetar i partisë së Hashim Thaçit dhe Kadri Veselit,” u shpreh ai.
Krasniqi u zotua se gjatë mandatit të tij do të angazhohet maksimalisht për rikthimin e PDK-së si forca më e madhe politike në Kosovë.
“Krejt çka di dhe krejt çka mundem do ta bëj për ta rikthyer Partinë Demokratike të Kosovës aty ku e ka vendin – si partinë më të madhe dhe udhëheqëse të Republikës së Kosovës,” deklaroi ai.
Rizgjedhja e Krasniqit vjen në një periudhë kur PDK-ja po synon riorganizim të brendshëm dhe pozicionim të fuqishëm në përballjet e ardhshme zgjedhore, me theks të veçantë në ofertën për qeverisje stabile dhe zhvillim ekonomik.
Konventa u zhvillua në një atmosferë të unifikuar, ku përveç rizgjedhjes së kryetarit, u diskutuan edhe drejtimet strategjike të partisë për periudhën e ardhshme politike.
