Kryetari i Partisë Demokratike të Kosovës (PDK), Memli Krasniqi, ka pritur sot në takim emisarin francez për Ballkanin Perëndimor, Rene Troccaz.
Krasniqi falënderoi përfaqësuesin francez për vëmendjen që Franca po i kushton Kosovës dhe rajonit, duke theksuar se integrimi i vendeve të Ballkanit Perëndimor në Bashkimin Evropian është “rruga më e drejtë dhe më e shpejtë” për mbylljen e kapitullit të tranzicionit në rajon.
Në takim, u diskutua për zhvillimet e fundit politike në Kosovë dhe nevojën për institucione funksionale e dialog konstruktiv. Krasniqi e njoftoi Troccaz se PDK-ja ka dhënë kontributin e saj për zhbllokimin institucional, përmes votimit të kryetarit të Kuvendit.
Ai falënderoi gjithashtu ambasadorin francez në Kosovë, Oliver Guerot, dhe zyrtarët e tjerë francezë për mbështetjen e vazhdueshme ndaj shtetit të Kosovës, duke theksuar se PDK mbetet e përkushtuar për stabilitet, përgjegjësi institucionale dhe të ardhmen evropiane të vendit.
