Kryetari i Partisë Demokratike të Kosovës, Memli Krasniqi, ka deklaruar se Lëvizja Vetëvendosje nuk është e interesuar për konstituimin e Kuvendit, por për zgjatjen e krizës institucionale.
Sipas tij, gjatë seancës së sotme u tentua të vihej në provë deklarata e opozitës se do të mbështeste një kandidat për kryetar Kuvendi që nuk ka qenë pjesë e Qeverisë Kurti. Krasniqi tha se deputeti Abelard Tahiri ka tentuar të gjejë një marrëveshje për votim, por kërkesa është injoruar.
Ai shtoi se PDK-së nuk iu lejua as një pauzë 10-minutëshe, nga e cila do të mund të arrihej dakordimi për votimin e një kandidati, përfshirë edhe Dimal Bashën. “Tek e fundit, këta kandidatë i propozon Vetëvendosja. Shpresoj që pasnesër të mos ketë të njëjtën arrogancë nga z. Dehari, dhe nëse ka propozim që mund të marrë votat e PDK-së, të na jepet një pauzë 10-minutëshe”, u shpreh Krasniqi.
