Kancelari gjerman Friedrich Merz ka akuzuar presidentin rus Vladimir Putin se po zhvillon një “luftë hibride” ndaj Gjermanisë dhe të gjithë Evropës.
“Ai po zhvillon një luftë informacioni ndaj nesh. Ai po zhvillon një luftë ushtarake kundër Ukrainës, dhe kjo luftë është e drejtuar ndaj të gjithë nesh”, deklaroi Merz për transmetuesin gjerman NTV më 6 tetor.
Sipas tij, qëllimi i Putinit është të përmbysë rendin politik të Evropës. “Prandaj e mbështesim Ukrainën, sepse është në interesin e Gjermanisë të mbrojë rendin politik të shoqërive të hapura dhe liberale”, theksoi ai.
I pyetur nëse Rusia po zhvillon një luftë direkte kundër Gjermanisë, Merz u shpreh qartë:
“Ai po zhvillon një luftë hibride kundër të gjithë neve.”
Në lidhje me shtimin e incidenteve me dronë në Gjermani dhe në mbarë Evropën, Merz tha se “kërcënimi është real dhe i njohur”, duke shtuar se Putini po synon të nxisë frikë në opinionin publik.
“Ne nuk do të frikësohemi dhe do ta mbrojmë veten në mënyrë efektive kundër këtij kërcënimi,” tha kancelari gjerman.
Sa i përket mundësisë për të biseduar me Putinin, Merz pranoi se e ka shqyrtuar idenë, por theksoi se “çdo përpjekje për dialog përfundon me sulme edhe më të ashpra ndaj Ukrainës.”
Gjermania është mbështetësja e dytë më e madhe në botë, pas Shteteve të Bashkuara, për ndihmën ushtarake ndaj Ukrainës që nga nisja e pushtimit rus në shkurt të vitit 2022.
Burimi: Radio Evropa e Lirë (REL)
