Kancelari i Gjermanisë, Friedrich Merz, do të udhëtojë të premten në Romë për një samit ndërqeveritar me kryeministren e Italisë, Giorgia Meloni, takim që pritet të shënojë një fazë të re në raportet mes dy vendeve dhe në orientimin politik të Bashkimit Evropian.
Gjatë fjalimit të tij në Forumin Ekonomik Botëror në Davos, Merz paralajmëroi se, së bashku me Melonin, ka përgatitur “ide të reja” për transformimin e Bashkimi Evropian, të cilat pritet të prezantohen së shpejti. Në mesin e tyre përmendet edhe një “frenim emergjence për burokracinë”, që sipas tij po e mban prapa potencialin ekonomik dhe politik të Evropës.
Sipas mediave gjermane, një aleancë më e ngushtë mes Romës dhe Berlinit është tashmë në horizont, me ambicien për të ndryshuar drejtimin e BE-së pas dekadash dominimi të boshtit franko-gjerman. E përditshmja gjermane Handelsblatt e përshkroi Melonin si një aleate gjithnjë e më të rëndësishme për Berlinin në kontekstin e zhvillimeve të reja globale.
Axhenda e samitit në Romë pritet të përfshijë marrëdhëniet dypalëshe, politikat evropiane dhe ekonomike, si dhe çështjet e sigurisë dhe mbrojtjes. Takimet institucionale do të mbahen në Villa Doria Pamphilj, të ndjekura nga një drekë pune dhe konferencë për shtyp, ndërsa pasdite parashikohet edhe një takim mes përfaqësuesve të biznesit italian dhe gjerman.
Një nga temat qendrore do të jetë konkurrueshmëria e Evropës. Merz ka theksuar se BE-ja po mbetet prapa në garën globale dhe ka bërë thirrje për krijimin e një tregu të vërtetë evropian të kapitalit dhe për zbatim më të shpejtë të reformave rregullatore. Në këtë kontekst, ai ka zhvilluar edhe bisedime me ish-kryeministrin italian Mario Draghi për Planin e Konkurrueshmërisë Evropiane, nga i cili, sipas tij, vetëm një pjesë e vogël është zbatuar deri tani.
Bashkëpunimi italo-gjerman shtrihet edhe në çështje të ndjeshme si politika industriale, tranzicioni energjetik dhe industria automobilistike, ku të dy vendet mbështesin parimin e neutralitetit teknologjik për arritjen e objektivave të Marrëveshjes së Gjelbër. Po ashtu, Roma dhe Berlini ndajnë një qasje të kujdesshme ndaj marrëdhënieve me Shtetet e Bashkuara, duke synuar shmangien e një lufte tregtare dhe duke favorizuar dialogun diplomatik.
Sipas mediave italiane, samiti i Romës mund të përmbyllet me nënshkrimin e një “Plani të ri veprimi italo-gjerman”, që përfshin bashkëpunim të thelluar në ekonomi, teknologji, mbrojtje dhe hapësirë. Një dokument i tillë do të formalizonte një partneritet strategjik që, sipas analistëve, mund të riformësojë ekuilibrat e brendshëm të Bashkimit Evropian në vitet që vijnë.
