Kancelari i Gjermanisë, Friedrich Merz, gjatë samitit të Bashkimit Evropian në Bruksel, i bëri thirrje Komisionit Evropian që të veprojë me më shumë vendosmëri në uljen e burokracisë, duke e cilësuar këtë si një “domosdoshmëri kulturore” për të ardhmen e Unionit.
“Ne kemi nevojë për një kthesë të vërtetë kulturore në BE,” deklaroi Merz, duke shtuar se është pozitive që Komisioni ka vendosur disa objektiva për thjeshtimin e procedurave, por se ato duhet të zbatohen në praktikë, e jo të mbeten vetëm në letër. Sipas tij, Komisioni ka premtuar të reduktojë barrën burokratike në një nivel që do të gjeneronte rreth 40 miliardë euro përfitime ekonomike, por deri më tani janë realizuar vetëm 9 miliardë, ndërsa masat konkrete të zbatuara kapin vlerën e vetëm 1.5 miliardë eurove. “Ka ende shumë për të bërë. Sa është arritur deri tani, nuk mjafton,” kritikoi ai.
Merz theksoi se për të arritur këtë objektiv, duhet të ulet realisht barra administrative, të thjeshtohet legjislacioni evropian në të gjithë sektorët, dhe që Komisioni e Parlamenti Evropian të jenë më të kujdesshëm me propozimet për rregulla të reja. Ai kërkoi gjithashtu që Parlamenti Evropian të rishikojë vendimin e tij, sipas të cilit nuk duhet thjeshtuar direktiva për zinxhirin evropian të furnizimeve, një hap që sipas tij do të ndihmonte në efikasitetin ekonomik të BE-së.
Në fund të samitit, liderët e BE-së ranë dakord që më 12 shkurt 2026 të mbahet një mbledhje e jashtëzakonshme e Këshillit Evropian, e cila do t’i kushtohet tërësisht aftësisë konkurruese të industrisë evropiane. Në këtë takim do të marrin pjesë edhe Mario Draghi dhe Enrico Letta, të cilët kanë paraqitur dy propozime strategjike për reforma që synojnë realizimin e plotë të tregut të brendshëm evropian.
