Në natën e Krishtlindjes, në Katedralen “Shën Nënë Tereza” në Prishtinë, u mbajt ceremonia tradicionale festive, ku u përcoll një mesazh i fuqishëm për dashuri, shpresë, solidaritet dhe bashkim shoqëror.
Në prani të Ipeshkëvit të Kosovës, Imzot Dodë Gjergji, përfaqësuesve institucionalë dhe qytetarëve të shumtë, u theksua domethënia shpirtërore dhe historike e Krishtlindjes, si festë që fton në reflektim, bujari dhe respekt të ndërsjellë.
Në fjalën e mbajtur, u rikujtua figura e Shën Nënë Terezës si shembulli më i lartë i mirësisë dhe shërbimit ndaj njerëzimit, si dhe u bë thirrje që kujdesi për më të dobëtit të mos mbetet vetëm simbolik, por të shndërrohet në veprim të përditshëm.
U theksua po ashtu trashëgimia e hershme kristiane e këtyre trojeve, duke përmendur figura historike ilire dhe dardane si Konstandini i Madh, Justiniani I, Shën Jeronimi, Papa Klementi dhe martirët Florin e Laurin nga Ulpiana. Në këtë vazhdimësi historike u përmend edhe Gjergj Kastrioti Skënderbeu, si mbrojtës i vlerave perëndimore, si dhe presidenti historik i Kosovës, Dr. Ibrahim Rugova, për vizionin e tij për paqe, dialog dhe harmoni ndërfetare.
Gjatë fjalimit u bë e ditur edhe takimi i fundit me Shenjtërinë e Tij, Papa Leoni XIV, ku u përcoll ftesa zyrtare për vizitë në Kosovë dhe u riafirmua përkushtimi i Kosovës për forcimin e marrëdhënieve me Selinë e Shenjtë dhe ruajtjen e harmonisë ndërfetare.
Ceremonia përfundoi me urime për paqe, shëndet dhe mirëqenie, si dhe me thirrjen që vlerat e Krishtlindjes – dashuria, shpresa dhe drita – të udhëheqin shoqërinë gjatë gjithë vitit që vjen.
