Kandidati për kryetar të Komunës së Lipjanit, Shukri Buja, ka shpalosur një nga pikat kryesore të programit të tij zgjedhor, që lidhet me arsimin fillor. Ai ka premtuar zbatimin e konceptit të mësimit të tërë ditës për nxënësit nga klasa 0 deri në klasën e pestë.
Sipas tij, ky program do t’u mundësojë fëmijëve të mësojnë, të zhvillojnë kreativitetin dhe të zbulojnë talentet e tyre në një ambient të sigurt. Përveç mësimit të rregullt sipas kurrikulës, nxënësit do të kenë mbështetje shtesë për detyrat e shtëpisë, si dhe mundësi për të marrë pjesë në aktivitete sportive, artistike e kulturore.
“Një drekë e shëndetshme dhe kujdesi i duhur për fëmijët do t’u japë prindërve qetësinë se ata janë në duar të sigurta gjatë gjithë ditës,” ka theksuar Buja, duke shtuar se projekti do të fillojë fillimisht si pilot në tri shkolla – një në qendër dhe dy në zona rurale.
Buja e ka cilësuar këtë nismë si një hap drejt një të ardhmeje më të ndritur për fëmijët e Lipjanit, duke u zotuar se nëse merr drejtimin e komunës, programi do të zgjerohet edhe në shkolla të tjera të komunës.
