Dhjetëra minatorë të ndërrimit të dytë në Minierën e Trepçës kanë mbetur të ngujuar për rreth gjashtë deri në shtatë orë, qindra metra nën tokë, si pasojë e një defekti në furnizimin me energji elektrike.
Situata është konfirmuar nga Sindikata e Punëtorëve të “Trepçës”, e cila ka bërë të ditur se minatorët kanë arritur të dalin nga miniera dhe se puna tashmë ka rifilluar normalisht.
Kryetari i Sindikatës së Punëtorëve të “Trepçës”, Ibrahim Jonuzi, ka deklaruar se ndërprerja e rrymës ka pamundësuar funksionimin e ashensorëve dhe daljeve të sigurisë, duke bërë që minatorët të mos arrijnë të dalin në kohë pas përfundimit të ndërrimit.
“Po e konfirmoj që minatorët kanë mbetur të ngujuar, por tashmë kanë dalë. Ka qenë për shkak të një defekti në furnizimin me energji elektrike. Kanë mbetur rreth gjashtë apo shtatë orë nën tokë, por tani situata është normalizuar dhe puna ka rifilluar”, ka deklaruar Jonuzi.
Sipas informatave, minatorët kishin mbetur të bllokuar në horizontet 8, 9 dhe 10 të minierës, në thellësi të konsiderueshme nën tokë. Ata ishte dashur të përfundonin ndërrimin disa orë më herët, por ndërprerja e rrymës e kishte pamundësuar daljen e tyre.
Kjo nuk është hera e parë që raportohet një situatë e tillë në Minierën e Trepçës. Vetëm disa ditë më parë, për shkak të një defekti të ngjashëm në energjinë elektrike, minatorë të tjerë kishin mbetur po ashtu të bllokuar nën tokë për disa orë.
Nuk raportohet për të lënduar, ndërsa pritet që menaxhmenti i ndërmarrjes të japë sqarime shtesë lidhur me shkaqet e përsëritura të ndërprerjeve të energjisë dhe masat për garantimin e sigurisë së minatorëve.
