Ministri në detyrë i Mbrojtjes së Kosovës, Ejup Maqedonci, ka reaguar ndaj kërcënimeve të vazhdueshme nga Serbia për një konflikt të mundshëm ushtarak, duke e cilësuar situatën si reale dhe shqetësuese. Në një deklaratë për A2CNN, Maqedonci theksoi se rreth 70 për qind e ushtrisë serbe është vendosur në jug të Serbisë, shumë pranë kufirit me Kosovën.
“Ne e shohim gjithmonë të mundshme që Serbia të ndërmarrë veprime për destabilizimin e rajonit”, deklaroi Maqedonci, duke shtuar se Kosova është e përkushtuar për ndërtimin e një FSK-je të aftë, që garanton mbrojtjen e territorit dhe qytetarëve.
Ministri vuri në dukje edhe praninë e 48 bazave të përparme operacionale të ushtrisë dhe xhandarmërisë serbe përgjatë kufirit, të cilat, sipas tij, përbëjnë një kërcënim të drejtpërdrejtë për sigurinë e Kosovës.
Maqedonci theksoi se këto veprime nuk janë të rastësishme, por një pjesë e një strategjie më të gjerë agresive të Serbisë. Ai përmendi rastin e grupit kriminal të udhëhequr nga Milan Radoiçiq, që në vitin e kaluar u përpoq të aneksonte veriun e Kosovës, si shembull konkret të kësaj qasjeje.
Megjithatë, Maqedonci garantoi se Forca e Sigurisë së Kosovës, në bashkëpunim me aleatët amerikanë dhe NATO-n, është e gatshme të mbrojë çdo pëllëmbë të territorit të Republikës së Kosovës. Ai nënvizoi se Kosova mbetet e përkushtuar ndaj vlerave perëndimore, demokracisë dhe paqes ndërkombëtare, duke theksuar rolin e saj si kontribuese për stabilitetin në rajon dhe më gjerë.
