Mirlind Daku ishte një nga emrat më të nxehtë të merkatos së verës së kaluar, teksa kontrata e tij me Rubin Kazan po shkonte drejt përfundimit. Megjithatë, në një kthesë të papritur, sulmuesi i Kombëtares së Shqipërisë vendosi të rinovojë marrëveshjen me klubin rus deri në vitin 2029.
Tashmë, prapaskenat e merkatos kanë nisur sërish të ziejnë. Sipas burimeve të afërta me lojtarin, agjencia që menaxhon Dakun po punon aktivisht për një transferim në Bundesligë, elitën e futbollit gjerman.
Tre klube gjermane janë përmendur konkretisht si destinacione të mundshme: Augsburg, Mainz dhe Hamburg. Interesimi për sulmuesin mbetet i lartë, por një lëvizje gjatë merkatos së janarit nuk shihet si opsion realist. Vera konsiderohet dritarja ideale për një transferim të madh.
Daku, i lindur në Gjilan, ka ndërtuar një profil serioz në futbollin rus. Me fanellën e Rubinit, ai numëron 35 gola dhe 13 asistime në 84 paraqitje, statistika që e bëjnë një sulmues tërheqës për tregun evropian.
Aktualisht, fokusi i tij mbetet i qartë: të mbyllë me sukses pjesën e mbetur të sezonit, duke ruajtur formën dhe vlerën në treg. Nëse gjithçka shkon sipas planit, vera e ardhshme mund ta gjejë Mirlind Dakun duke bërë hapin më të madh të karrierës – drejt Bundesligës, aty ku testohen vërtet sulmuesit e fortë.
