Në futbollin rus ka shpërthyer një tjetër skandal. Sulmuesi shqiptar i Rubin Kazanit, Mirlind Daku, është bërë shënjestër e thirrjeve fyese nga tifozët e Zenitit të Shën Petersburgut gjatë ndeshjes së 12 gushtit në fazën e grupeve të Kupës së Rusisë.
Incidenti ndodhi në stadiumin e Zenitit, ku skuadra vendase mposhti Rubinin me rezultatin 3-0. Megjithëse Daku arriti të shënonte një gol, ai u anulua pas ndërhyrjes së VAR-it. Pas ndeshjes, kreu i Komitetit të Kontrollit dhe Disiplinës së Federatës Ruse të Futbollit (RFU), Artur Grigoryants, konfirmoi për agjencinë “RIA Novosti” se episodi me thirrjet ofenduese do të shqyrtohet në mbledhjen e 20 gushtit.
“Në ndeshjen Zenit–Rubin do të shqyrtojmë brohoritjet masive të përsëritura me shprehje fyese nga tifozët e ekipit vendas, drejtuar sulmuesit të ekipit mik, Mirlind Daku”, deklaroi Grigoryants.
Interesimi i Fiorentinës
Emri i Dakut ka qenë shpesh në qendër të merkatos. Verën e kaluar, Zeniti shfaqi interes për transferimin e tij, por marrëveshja nuk u arrit dhe Rubin Kazani ia zgjati kontratën sulmuesit 27-vjeçar. Tani, sipas mediave ruse dhe italiane, në garë është futur edhe Fiorentina, e cila po monitoron nga afër paraqitjet e tij.
Në ndeshjen e fundit, megjithatë, Daku nuk arriti të linte gjurmë. Ai pati vetëm dy gjuajtje drejt portës, një pozicion jashtë loje dhe fitoi katër duele nga gjithsej 14.
Analiza e trajnerit kundërshtar
Trajneri i Rostovit, Alba, tha pas ndeshjes se skuadra e tij kishte përgatitur plan të posaçëm për ndalimin e sulmuesit shqiptar:
“Çfarë rekomandimesh? Mos e lini Dakun të luajë një me një dhe në momentin e presionit, kur topi shkoi në krah. Luajtëm me kujdes dhe jam i lumtur për vijën mbrojtëse.”
Megjithatë, analistët vërejnë se Daku shpesh u hap në zona, por nuk mori pasimet e duhura nga shokët e ekipit, çka e bëri më të lehtë neutralizimin e tij.
