Një person është arrestuar gjatë natës nga Policia e Kosovës nën dyshimin për armëmbajtje pa leje, pasi tentoi t’i shmangej një patrulle policore.
Sipas njoftimit zyrtar, rreth orës 03:00, Njësia e Trafikut Rajonal në një pikë-kontrolli në rrugën “Ulqini” tentoi të ndalonte një veturë me targa vendore, por drejtuesi nuk iu bind urdhrit dhe vazhdoi lëvizjen.
Pas një ndjekjeje të koordinuar nga disa njësi policore, i dyshuari braktisi automjetin dhe u përpoq të largohej në këmbë, duke tentuar të fshehë një armë duke e hedhur nga trupi. Policia e kapi në vendngjarje dhe gjeti një pistoletë me shtatë fishekë.
I dyshuari, mashkull kosovar, pas intervistimit u lirua në procedurë të rregullt me urdhër të prokurorit të shtetit, ndërsa ndaj tij është hapur rast penal për “Mbajtje në pronësi, kontroll ose posedim të paautorizuar të armës”.
