Policia e Kosovës ka njoftuar se ka arrestuar një person në Mitrovicën e Veriut, nën dyshimin për kryerjen e veprës penale “Dhunim”.
Sipas njoftimit zyrtar, më 29 korrik 2025, rreth orës 00:45, njësitë policore kanë pranuar informacione për përdorim të substancave të dyshuara narkotike nga disa persona në rrugën “Serdara Janka Vukotića”. Pas reagimit të menjëhershëm, policia ka ndërhyrë në një lokal (furrë buke), ku kanë identifikuar tre persona – një mashkull dhe dy femra – të cilët më pas janë shoqëruar në stacion policor për intervistim.
Gjatë procedurës hetimore është konstatuar se njëra nga femrat e pranishme, e cila është e mitur, kishte pasur marrëdhënie seksuale me të dyshuarin disa ditë më parë. Pas konstatimit të moshës së viktimës, Prokurori i Shtetit ka autorizuar që rasti të trajtohet si “Dhunim”, duke i hapur rrugë procedurës penale.
Njësitë hetimore të stacionit policor dhe ato rajonale në Mitrovicën e Veriut janë angazhuar në trajtimin e mëtejmë të çështjes. Me vendim të prokurorit kujdestar, i dyshuari M.C. (21 vjeç) është ndaluar dhe dërguar në mbajtje për 48 orë.
Policia e Kosovës rithekson përkushtimin e saj për të luftuar çdo dukuri që cenon sigurinë publike dhe ligjshmërinë në vend, duke ftuar qytetarët për bashkëpunim të vazhdueshëm në raportimin e rasteve të ngjashme.
