Rusia ka reaguar zyrtarisht pas paralajmërimeve të fuqishme nga Perëndimi për vendosjen e sanksioneve të reja, nëse Moska nuk pranon armëpushimin 30-ditor të propozuar për konfliktin në Ukrainë.
Zëdhënësi i Kremlinit, Dmitry Peskov, në një deklaratë për agjencinë shtetërore ruse TASS, theksoi se Rusia është tashmë e përgatitur për përballjen me sanksione të reja, duke shtuar se këto masa nuk përbëjnë më kërcënim për Moskën.
“Ne jemi mësuar tashmë me sanksionet. E dimë çfarë duhet të bëjmë për të minimizuar ndikimin e tyre dhe tani kemi mësuar ta bëjmë mirë. Nuk ka kuptim që të përpiqen të na trembin”, tha Peskov.
Ukraina, ende jo e gatshme për negociata
Në një intervistë për ABC News, Peskov deklaroi se Ukraina “nuk është e gatshme për bisedime me Rusinë për t’i dhënë fund luftës”, duke nënvizuar se për momentin “forcat ruse janë duke përparuar në terren”.
Ai komentoi edhe praninë e liderëve të lartë perëndimorë në Kievin e ditëve të fundit, duke vërejtur se disa prej tyre janë “shqetësuar” nga pjesëmarrja e udhëheqësve ndërkombëtarë, përfshirë Presidentin kinez Xi Jinping, në ceremoninë e Ditës së Fitores në Moskë.
Perëndimi vendos afat: 30 ditë për armëpushim – në të kundërt, sanksione të reja
Reagimi i Moskës vjen pas një takimi të rëndësishëm në Kiev, ku liderët e Britanisë, Francës, Gjermanisë, Polonisë dhe Ukrainës, në bashkëpunim me Presidentin amerikan Donald Trump, bënë thirrje për një armëpushim të menjëhershëm dhe pa kushte që do të hynte në fuqi më 12 maj.
Në rast se Moska refuzon këtë nismë, Perëndimi paralajmëroi se do të vendosë sanksione të reja “masive” ndaj Rusisë.
“Topi tani është në fushën e Rusisë”, thuhet në deklaratën e përbashkët të liderëve, të cilët biseduan me Presidentin Trump përmes një lidhjeje të drejtpërdrejtë gjatë takimit.
