Kremlini ka përshëndetur takimin e zhvilluar një ditë më parë në Moskë mes presidentit rus Vladimir Putin dhe të dërguarit special të SHBA-së Steve Witkoff, duke e cilësuar atë si “shumë të dobishëm në çdo aspekt”.
Sipas këshilltarit diplomatik të Kremlinit, Yuri Ushakov, sot në Abu Dhabi do të mbahet takimi i parë i një grupi pune trepalësh mes Rusisë, Shteteve të Bashkuara dhe Ukrainës, i fokusuar në çështjet e sigurisë.
“Është rënë dakord që takimi i parë i grupit të punës trepalësh mbi sigurinë të mbahet sot në Abu Dhabi,” u shpreh Ushakov për gazetarët, duke shtuar se delegacioni rus do të udhëhiqet nga Igor Kostyukov, një zyrtar i lartë i Shtabit të Përgjithshëm të ushtrisë ruse.
Nga ana tjetër, Kremlini ka paralajmëruar se nuk mund të ketë paqe të qëndrueshme në Ukrainë pa zgjidhjen e çështjes territoriale. “Pa një marrëveshje për territorin, nuk mund të pritet një paqe afatgjatë,” theksoi Ushakov, duke shtuar se Rusia mbetet e interesuar për një zgjidhje politike dhe diplomatike, por deri atëherë do të vazhdojë të ndjekë objektivat e saj ushtarake në terren.
Ushakov bëri të ditur gjithashtu se sot në Abu Dhabi do të mbahet edhe një takim mbi çështjet ekonomike mes Steve Witkoff dhe të dërguarit rus për ekonominë ndërkombëtare, Kirill Dmitriev.
Ndërkohë, presidenti amerikan Donald Trump ka deklaruar se Putin është i interesuar për arritjen e një marrëveshjeje paqeje me Ukrainën.
Mediat ndërkombëtare raportojnë se SHBA dhe Ukraina po diskutojnë një propozim për një armëpushim të kufizuar në sektorin energjetik, që do të ndalonte sulmet ndaj infrastrukturës energjetike të të dyja palëve. Megjithatë, sipas burimeve të Financial Times, ka skepticizëm për suksesin e kësaj nisme, pasi Kremlini e sheh presionin mbi energjinë e Ukrainës si mjet kyç ndikimi, ndërsa edhe Kievi heziton të ndalë sulmet ndaj objektivave strategjikë rusë.
Takimet e sotme në Emiratet e Bashkuara Arabe shihen si një test i rëndësishëm për mundësinë e hapjes së një procesi më të gjerë diplomatik për përfundimin e luftës në Ukrainë.
