E shtuna, dita e fundit e muajit maj, do të mbyllet me përmirësim të dukshëm të kushteve atmosferike në të gjithë rajonin. Sipas parashikimeve meteorologjike, në Kosovë pritet mot kryesisht me diell, i shoqëruar me vranësira lokale gjatë mesditës. Pasdite do të mbizotërojë dielli, ndërsa temperaturat do të shënojnë rritje të ndjeshme, me maksimumin që pritet të arrijë deri në 24°C.
Megjithëse më e ngrohtë, dita do të vijojë të shoqërohet nga erëra të freskëta, të cilat do të fryjnë nga drejtimi i veriut dhe verilindjes.
Tendencë e ngjashme meteorologjike do të regjistrohet edhe në Shqipëri, Maqedoninë e Veriut, Luginën e Preshevës dhe Malin e Zi, ku do të mbajë mot kryesisht me diell, por me vranësira të lehta në disa zona kontinentale. Temperaturat në gjithë rajonin do të fillojnë të rriten gradualisht, duke shënuar fundin e periudhës me mot të paqëndrueshëm që karakterizoi javët e fundit të pranverës.
Meteorologët parashikojnë një fillim të ngrohtë të qershorit, me kushte gjithnjë e më të favorshme për aktivitete në natyrë.
