NATO ka nisur stërvitjet vjetore të quajtura “Steadfast Noon”, një seri manovrash që synojnë praktika për mbrojtjen e territorit të Aleancës me mjete bërthamore. Sipas njoftimit të aleancës, në stërvitje do të përfshihen rreth 2,000 pjesëtarë të personelit dhe afro 70 avionë që do të operojnë gjatë dy javëve të ardhshme.
Manovrat do të zhvillohen kryesisht në hapësirën ajrore mbi Detin e Veriut, ndërsa role të rëndësishme pritet t’u kenë edhe bazat ajrore në Volkel (Holandë), Kleine Brogel (Belgjikë), Lakenheath (Mbretëria e Bashkuar) dhe Skrydstrup (Danimarkë). NATO njoftoi se Forcat e Armatosura Gjermane kanë ofruar për stërvitje tre avionë Tornado (të aftë për transportin e bombave bërthamore amerikane të tipit B61) dhe katër Eurofighter.
Aleanca thekson se bëhet fjalë për stërvitje rutinore që synojnë të ruajnë dhe përmirësojnë besueshmërinë e masave të parandalimit bërthamor. Megjithatë, zyrtarët pohojnë se manovrat gjithashtu dërgojnë një mesazh të qartë drejt Moskës për gatishmërinë e NATO-s për të mbrojtur aleatët, përfshirë edhe me mjetet e fundit në dispozicion, në rast nevoje.
Ekspertët ushtarakë shpjegojnë se stërvitjet përfshijnë procedura të detajuara logjistike dhe teknike — nga transporti i sigurt i pajisjeve bërthamore nga magazinat e nën-tokës tek montimi nën avionët dhe përgatitjet për fluturim — por gjatë manovrave përdoren vetëm bomba trajnimi, pa kokat reale bërthamore.
NATO nuk ka zbuluar skenarët konkretë që do të praktikohen, ndërsa nuk ka dhënë detaje të plota për vendndodhjen e armëve bërthamore amerikane të stacionuara në Evropë, një çështje që mbetet e diskutueshme dhe e ndjeshme për publikun. Parimi i ndarjes bërthamore të Aleancës parashikon që, në rast emergjent, pajisjet e Shteteve të Bashkuara të mund të përdoren nga avionët e vendeve partnere të cilët kanë këtë kapacitet.
Qëllimi kryesor i stërvitjeve, sipas NATO-s, është ruajtja e një posture të besueshme të parandalimit bërthamor dhe sigurimi që procedurat operacionale të jenë gjithmonë të azhurnuara dhe funksionale.
