Agjencia e Ushqimit dhe Veterinarisë në Kosovë ka ndaluar importimin e 1,080 litrave vaj ulliri për sallatë që ishte nisur nga Shqipëria drejt Kosovës.
Sipas njoftimit zyrtar të Agjencia e Ushqimit dhe Veterinarisë, pas kontrollit të kryer nga Inspektorati Fitosanitar Kufitar në pikën doganore të Vërmicë, është konstatuar se produkti nuk i plotësonte kushtet e sigurisë ushqimore.
Ngarkesa me vaj ulliri për sallatë ishte eksportuar nga kompania “Euro Made 2021” nga Lushnja e Shqipërisë, por gjatë kontrollit fizik është vërejtur se produkti nuk kishte të dhënat e duhura në deklaracionin e mallit. Përveç kësaj, autoritetet kanë konstatuar se transporti ishte bërë në kushte jo të përshtatshme higjienike.
Sipas inspektorëve, vaji ishte transportuar së bashku me mallra jo ushqimore, përfshirë detergjentë, gjë që rrit rrezikun e kontaminimit dhe e bën produktin të pasigurt për konsum.
Në bazë të legjislacionit në fuqi për sigurinë ushqimore dhe mbrojtjen e konsumatorit, autoritetet kanë vendosur që kjo sasi e vajit të mos lejohet të hyjë në territorin e Republikës së Kosovës.
Ministria e Bujqësisë, përmes Agjencisë së Ushqimit dhe Veterinarisë, ka theksuar se do të vazhdojë kontrollet e rrepta në kufi për të garantuar sigurinë ushqimore dhe mbrojtjen e shëndetit të qytetarëve.
