Një ndërprerje e gjerë në internet bëri që faqet e njohura, përfshirë X dhe ChatGPT, të mos ishin të aksesueshme për mijëra përdorues këtë të martë. Arsyeja u identifikua te kompania e madhe e infrastrukturës së internetit, Cloudflare.
Sipas platformës monitoruese Downdetector, përdoruesit nisën të raportojnë probleme në mesditë, ndërsa Cloudflare njoftoi për një “rritje të menjëhershme të trafikut të pazakontë” që filloi rreth orës 11:20 UTC, duke shkaktuar gabime në rrjetin e saj. Kompania theksoi se ende nuk është identifikuar shkaku i këtij shpërthimi, por të gjitha ekipet janë angazhuar për të rikthyer funksionimin normal të shërbimeve.
Më vonë gjatë ditës, Cloudflare raportoi se kishte zbatuar një ndryshim që riktheu funksionimin e faqeve të prekura. Për disa përdorues, X shfaqte mesazhe gabimi të serverëve të brendshëm, ndërsa ChatGPT kërkonte që përdoruesit të “zhbllokonin challenges cloudflare.com” për të vazhduar përdorimin.
Në njoftimet e saj, kompania paralajmëroi se ndërprerja potencialisht prekte shumë klientë dhe se disa përdorues mund të vazhdojnë të shohin gabime derisa procesi i rikuperimit të përfundojë.
Çfarë është Cloudflare?
Cloudflare është një nga ofruesit kryesorë globalë të shërbimeve të sigurisë në internet, duke verifikuar trafikun për të dalluar përdoruesit njerëz nga robotët. Sipas kompanisë, rreth 20% e të gjitha faqeve në botë përdorin shërbimet e saj në forma të ndryshme. Ende nuk dihet saktësisht sa faqe u prekën dhe në çfarë mase.
Edhe vetë Downdetector përjetoi probleme për një pjesë të vizitorëve, duke shfaqur mesazhe gabimi.
Alp Toker, drejtor i organizatës NetBlocks, tha për BBC-në se ndërprerja tregon një “prishje katastrofike të infrastrukturës së Cloudflare” dhe nënvizoi varësinë e madhe të shumë faqeve nga kompania për mbrojtje ndaj sulmeve kibernetike tip ‘denial of service’. Ai theksoi se Cloudflare është kthyer në “një nga pikat më të mëdha të dështimit në internet”.
Kjo ndodh pas një serie ndërprerjesh të ngjashme muajin e kaluar, ku u prekën shërbime të Amazon Web Services dhe më pas Microsoft Azure, duke nxjerrë në pah varësinë e kompanive nga rrjetet e mëdha cloud. Jake Moore, këshilltar global për sigurinë kibernetike në ESET, deklaroi se “kompanitë shpesh mbështeten fort te Cloudflare, Microsoft dhe Amazon për hostimin e faqeve dhe shërbimeve të tyre, pasi alternativa të sigurta janë të pakta.”
