Kompania për Distribuimin e Energjisë Elektrike në Kosovë (KEDS) ka njoftuar se të dielën, më 2 nëntor 2025, do të realizohen punime të domosdoshme për siguri të sistemit energjetik, të cilat do të shkaktojnë ndërprerje të përkohshme të energjisë elektrike në disa zona të Pejës dhe Gjakovës.
Në Pejë, nga ora 09:00 deri në 17:00, do të ketë ndërprerje të furnizimit me rrymë për Elkos Group, për shkak të eleminimit të rrjetit të vjetër sipas zgjidhjes teknike nr. 3687.
Ndërsa në Gjakovë, punimet do të zhvillohen në kuadër të projekteve investive në rajonin e Rahovecit, ku nga ora 08:00 deri në 09:00 dhe nga ora 16:00 deri në 17:00 do të preken fshatrat Bratotin, Drenoc, Nushpal, Pastasellë, Pataçan i Epërm, Pataçan i Poshtëm, Senoc, Varjak dhe Zatriç.
Nga ora 08:00 deri në 17:00, pa tension do të mbesin edhe Pataqani i Poshtëm dhe disa nënstacione të ujësjellësit dhe rrjetit lokal të tensionit të ulët. Këto punime përfshijnë ngritjen e shtyllave elektrike, montimin e konzollave dhe izolatorëve, si dhe shtrirjen e përçuesve të rinj në kuadër të projektit investiv “Lot 12 – Pataqani”.
Sipas KEDS-it, në rajonet e tjera të Kosovës nuk pritet të ketë ndërprerje të energjisë elektrike gjatë kësaj dite. Kompania u ka bërë thirrje konsumatorëve që të kenë mirëkuptim dhe të marrin masat e nevojshme gjatë periudhës së punimeve.
