Ndeshja gjysmëfinale e parë mes Barcelonës dhe Interit në Ligën e Kampionëve përfundoi me një rezultat spektakolar 3:3, por ajo që ka ndezur debatet më të mëdha është anulimi i një goli të Interit në minutat vendimtare.
Henrikh Mkhitaryan e dërgoi topin në rrjetë për herë të katërt për skuadrën italiane, në një moment që mund të kishte vendosur fatin e takimit në favor të “Neroazzurrëve”. Por goli u anulua nga gjyqtari francez Clément Turpin pas ndërhyrjes së sistemit VAR, për një pozicion shumë të diskutueshëm jashtë loje.
“Ndihem shumë keq. Fatkeqësisht, isha vetëm dy centimetra jashtë loje, por ky është futbolli dhe nuk mund të bësh asgjë,” u shpreh Mkhitaryan pas ndeshjes.
“Doja shumë të shënoja, ndoshta nxitova në momentin e fundit. Ky është futbolli – ndoshta do të kem rastin të shënoj në ndeshjen e dytë. Do të shohim.”
Teknologjia ishte përcaktuese në këtë rast – një pjesë e trupit të mesfushorit armen, më saktësisht gishti i dorës, u kap jashtë loje, çka mjaftoi për të ndërhyrë vendimi teknik. Ky detaj ka nxitur kritika dhe keqardhje jo vetëm nga lojtarët e Interit, por edhe nga tifozët dhe komentatorët sportivë.
Pavarësisht anulimit të golit, Interi largohet nga Camp Nou me një rezultat të vlefshëm, pas tre golave të shënuar në transfertë ndaj një rivali të fuqishëm si Barcelona. Ndeshja e kthimit zhvillohet të martën e ardhshme në “Giuseppe Meazza”, ku do të vendoset finalistja e parë e Ligës së Kampionëve për sezonin aktual.
