Për herë të parë në historinë e marrëdhënieve mes Shqipërisë dhe Italisë, dy qeveritë pritet të zhvillojnë një mbledhje të përbashkët me të gjithë kabinetet qeverisëse.
Sipas informacioneve, mbledhja e qeverisë së Edi Ramës dhe asaj të Giorgia Melonit do të mbahet më 13 nëntor, në kuadër të forcimit të bashkëpunimit strategjik mes dy vendeve, transmeton Top Channel.
Vetëm një ditë më parë, qeveria shqiptare miratoi në parim një marrëveshje të re strategjike me Italinë, e cila përfshin të paktën 10 fusha bashkëpunimi, duke filluar nga shëndetësia, energjia dhe mjedisi, e deri te industria e sigurisë dhe zhvillimi inteligjent.
Në këtë takim pritet që Rama dhe Meloni të nënshkruajnë marrëveshjen e bashkëpunimit, e cila shihet si një hap i rëndësishëm në forcimin e lidhjeve politike, ekonomike dhe diplomatike mes Tiranës dhe Romës./Qendra.INFO
