Një front i ftohtë ajror pritet të depërtojë nesër në rajon, megjithëse ndikimi i tij do të jetë i kufizuar. Sipas parashikimeve meteorologjike, fronti do të sjellë kryesisht një freskim të lehtë të motit dhe një ulje të ndjeshme të temperaturave në disa zona.
Gjatë ditës së nesërme, në të gjithë territorin do të mbizotërojë mot me diell dhe vranësira të herëpashershme lokale. Era do të fryjë nga veriu dhe, në disa raste, pritet të jetë mjaft e fuqishme, duke ndikuar drejtpërdrejt në uljen e temperaturave.
Në Dukagjin, temperaturat maksimale pritet të arrijnë deri në 29°C, ndërsa në Rrafshin e Kosovës do të jetë disi më freskët. Nuk përjashtohet mundësia që në disa zona të izoluara të ketë riga apo rrebeshe afatshkurtra shiu.
Edhe në Shqipëri, Maqedoninë e Veriut, Luginën e Preshevës dhe Malin e Zi, moti do të karakterizohet nga diell dhe vranësira kalimtare, me temperatura që do të shënojnë një ulje të lehtë. Pasditja mund të sjellë zhvillime të lehta konvektive, kryesisht në juglindje të Shqipërisë dhe në perëndim të Maqedonisë së Veriut, ku mund të ketë rrebeshe të izoluara shiu të shoqëruara me vetëtima dhe bubullimë.
Meteorologët theksojnë se ky ndryshim nuk shënon ndonjë përkeqësim të theksuar të motit, por përfaqëson një ndërprerje të përkohshme të temperaturave të larta që kanë përfshirë rajonin në ditët e fundit.
