Në Kosovë, e shtuna do të shënojë një ndryshim të dukshëm të kushteve meteorologjike. Pavarësisht se masat e ajrit të nxehtë do të mbeten të qëndrueshme gjatë pjesës së parë të ditës, temperaturat e larta nuk do të zgjasin gjatë.
Paradite dhe në mesditë pritet të mbajë mot kryesisht i nxehtë me intervale kohore me diell. Megjithatë, pasditja do të sjellë shtim të ndjeshëm të vranësirave, të cilat do të shoqërohen me reshje lokale shiu, rrebeshe të fuqishme, vetëtima dhe bubullima.
Meteorologët paralajmërojnë edhe mundësinë e krijimit të vranësirave të dendura si pasojë e kalimit të një fronti të fuqishëm atmosferik, i cili mund të sjellë reshje intensive dhe erëra të forta, sidomos gjatë kalimit të frontit të ftohtë.
Pas kësaj, temperaturat e larta të mëngjesit dhe mesditës pritet të pësojnë ulje të ndjeshme, duke sjellë një lehtësim të përkohshëm nga vala e të nxehtit që ka përfshirë vendin ditëve të fundit.
