Në Dhomat e Specializuara të Kosovës, sot nga ora 09:30, vazhdon gjykimi në rastin “Thaçi dhe të tjerët” lidhur me akuzat për administrimin e drejtësisë.
Seanca e sotme pritet të fokusohet në pyetjet e ekipeve të mbrojtjes për dëshmitarin e parë të Prokurorisë, i identifikuar si Dëshmitari 7, i cili po dëshmon nën masa mbrojtëse.
Deklaratat hyrëse dhe pozicionet e palëve
Javën e kaluar, Zyra e Prokurorit të Specializuar (ZPS) lexoi përmbledhjen e aktakuzës dhe paraqiti deklaratën hyrëse.
Të pestë të akuzuarit – Hashim Thaçi, Hajredin Kuçi, Isni Kilaj, Bashkim Smakaj dhe Fadil Fazliu – janë vetëdeklaruar të pafajshëm.
Mbrojtja e Bashkim Smakajt përfundoi deklaratën hyrëse, ndërsa ajo e Isni Kilajt e paraqiti më pas qëndrimin e saj para trupit gjykues.
Arrestimet dhe rrjedha procedurale
Pas konfirmimit të aktakuzës, Isni Kilaj, Bashkim Smakaj dhe Fadil Fazliu u arrestuan më 5 dhjetor dhe u transferuan në paraburgim në Hagë. Hashim Thaçi mori fletarrestimin në objektin e paraburgimit, ndërsa Hajredin Kuçi u ftua për paraqitje.
Gjatë paraqitjeve fillestare, të mbajtura në dhjetor 2023 dhe janar 2025, të gjithë të akuzuarit u deklaruan të pafajshëm ndaj akuzave.
Më 12 nëntor 2025, pas përfundimit të procedurave paraprake, çështja iu kalua gjykatësit të vetëm për gjykim. Konferenca përgatitore u mbajt më 28 nëntor 2025, ndërsa procesi gjyqësor zyrtarisht nisi më 27 shkurt 2026.
Gjykimi pritet të vazhdojë me dëgjimin e dëshmitarëve dhe paraqitjen e provave nga palët në vijim.
