Prizreni sot u vesh me solemnitet kombëtar, teksa në nder të 28 Nëntorit – Ditës së Flamurit, u zbulua shtatorja e heroit të kombit, komandant Tahir Sinani. Në ceremoninë përurimore mori pjesë edhe Fatmir Limaj, bashkëluftëtar dhe mik i ngushtë i Sinanit.
Limaj e përshkroi këtë moment si një nga nderimet më domethënëse për figurën e një njeriu që, siç u shpreh ai, “është shkruar përjetësisht në historinë e lirisë sonë”.
“Tahir Sinani nuk ishte vetëm një komandant i guximshëm, por një patriot me zemër të madhe, që jetën ia kushtoi kauzës së lirisë. Qëndresa dhe sakrifica e tij do të mbeten udhërrëfyes për brezat që vijnë”, deklaroi Limaj.
Shtatorja e re në Prizren vjen si një homazh ndaj një prej figurave qendrore të luftës për liri, një simbol i vendosmërisë dhe unitetit kombëtar.
Në ditën kur shqiptarët nderojnë flamurin, pavarësinë dhe historinë e tyre, komandant Tahir Sinani rikthehet në zemrën e qytetit si një kujtim i gjallë i sakrificës dhe dashurisë për atdheun.
