Kryeministri Edi Rama niset pasditen e sotme drejt Brukselit, ku nesër do të mbahet konferenca e 7-të ndërqeveritare mes Shqipërisë dhe Bashkimit Evropian, e cila shënon hapjen e grupkapitullit të fundit të negociatave, atë të “Bujqësisë dhe Kohezionit”.
Sipas axhendës zyrtare, delegacioni shqiptar, i kryesuar nga Rama, do të ulet në tryezën e punës me përfaqësuesit e BE-së rreth orës 08:00, ndërsa në 09:15 do të mbahet konferenca e përbashkët për shtyp mes Kryeministrit shqiptar dhe komisioneres për Zgjerimin, Marta Kos.
Ky është grupkapitulli i gjashtë dhe i fundit, pas një procesi të gjatë që nisi më 19 korrik 2022, kur Shqipëria u ul për herë të parë në konferencë ndërqeveritare me BE-në, duke çelur zyrtarisht negociatat.
📘 Ecuria e kapitujve deri tani:
-
19 korrik 2022 – Konferenca e parë ndërqeveritare, çelja zyrtare e negociatave
-
15 tetor 2024 – Çelja e grupkapitullit të parë “Themeloret”
-
17 dhjetor 2024 – Nisin bisedimet për “Marrëdhëniet me Jashtë”
-
Prill–Maj 2025 – Hapja e “Tregut të Brendshëm” dhe “Konkurrueshmërisë e Rritjes gjithëpërfshirëse”
-
15 shtator 2025 – Konferenca e gjashtë, “Axhenda e Gjelbër”
-
Nëntor 2025 – Konferenca e shtatë, “Bujqësia dhe Kohezioni”
Me këtë hap, Shqipëria mbyll fazën teknike të hapjes së të gjithë grupkapitujve dhe hyn në një fazë më të gjerë politike, që kërkon ratifikim nga 27 parlamentet kombëtare të BE-së.
Brukseli mbetet optimist se deri në vitin 2030, Shqipëria mund të realizojë plotësisht anëtarësimin në Bashkimin Evropian.
Nga ana tjetër, Rama e ka shpallur integrimin në BE si prioritetin kryesor të mandatit të tij të katërt, duke theksuar se “rruga drejt Evropës është e pakthyeshme dhe strategjike për Shqipërinë.”
