Në një intervistë për rrjetin amerikan Fox News, kryeministri izraelit Benjamin Netanyahu deklaroi se Izraeli synon të marrë kontrollin e të gjithë Rripit të Gazës, por jo ta qeverisë atë. Këto komente vijnë në prag të një takimi të kabinetit izraelit, ku do të shqyrtohet propozimi për një ndërhyrje më të thellë në territorin palestinez.
“Ne synojmë të marrim kontrollin për të garantuar sigurinë tonë, për të larguar Hamasin nga aty dhe për t’ia kaluar qeverisjen një administrate civile që nuk është e lidhur me Hamasin apo me ndonjë grup që mbështet shkatërrimin e Izraelit”, u shpreh Netanyahu.
Ai theksoi se Izraeli nuk synon të qeverisë Gazën, por të krijojë një perimetër sigurie dhe më pas t’ia dorëzojë kontrollin forcave arabe, duke lënë të hapur mundësinë për një zgjidhje rajonale.
“Ne nuk duam të qëndrojmë atje si një organ qeverisës”, tha ai, duke theksuar qartë ndarjen mes kontrollit ushtarak dhe administrimit civil.
Rritje e presionit ndërkombëtar dhe situatë alarmante humanitare
Deklaratat e Netanyahut vijnë në një kohë kur presioni ndërkombëtar ndaj Izraelit po rritet për shkak të situatës alarmante humanitare në Gaza. Sipas Ministrisë së Shëndetësisë në territorin palestinez, vetëm në 24 orët e fundit janë regjistruar katër vdekje për shkak të zisë së bukës dhe kequshqyerjes, duke çuar në 197 numrin total të viktimave të urisë, përfshirë 96 fëmijë, që nga fillimi i ofensivës izraelite pas sulmeve të 7 tetorit 2023.
Përplasje të brendshme në kabinetin izraelit
Komentet e Netanyahut kanë hapur diskutime të gjera dhe përplasje brenda strukturave të larta izraelite, përfshirë mospajtime me shefin e ushtrisë, gjeneral-lejtnant Eyal Zamir, i cili thuhet se kundërshton planin për një ripushtim të plotë të Gazës.
Në një deklaratë publike të enjten, Zamir theksoi:
“Do të vazhdojmë të shprehim qëndrimin tonë pa frikë. Nuk po merremi me teori, por me çështje jete a vdekjeje.”
Ndërkohë, ministri i Mbrojtjes, Israel Katz, ka mbështetur të drejtën e shefit të ushtrisë për të shprehur pikëpamjet e tij, por ka kujtuar se politikat e qeverisë janë përfundimtare dhe duhet të respektohen nga të gjitha strukturat ushtarake.
Skepticizëm dhe kritika nga brenda Izraelit
Gideon Levy, gazetar i njohur i gazetës izraelite Haaretz, e cilësoi si “të pabesueshme dhe jo realiste” idenë e Netanyahut për të dorëzuar Gazën një force tjetër qeverisëse.
“Kush do ta marrë përsipër Gazën? Kush do të jetë i gatshëm ta bëjë këtë, përveç ushtrisë izraelite?”, pyeti Levy, duke akuzuar qeverinë për një qëllim të fshehur për spastrimin etnik të Gazës.
Sipas tij, synimi përfundimtar është zhvendosja e popullsisë së Gazës në “kampe humanitare” dhe më pas dëbimi i tyre nga territori.
