Startupi amerikan i bioteknologjisë Neuralink, i bashkëthemeluar nga Elon Musk, ka arritur të mbledhë 650 milionë dollarë në raundin më të fundit të financimit, ndërsa pajisja e saj revolucionare e implantit në tru po hyn në fazën e provave klinike, raporton Reuters.
Në një deklaratë zyrtare, kompania theksoi se fondet do të përdoren për të përshpejtuar zhvillimin dhe shpërndarjen e teknologjisë së saj për pacientët me nevoja të paplotësuara mjekësore.
“Financimi na ndihmon ta sjellim teknologjinë tonë më afër më shumë njerëzve – për t’u rikthyer pavarësinë atyre që kanë nevoja të pazgjidhura dhe për të shtyrë kufijtë e asaj që është e mundur me ndërfaqet tru-kompjuter,” thuhet në njoftimin e Neuralink.
Sipas kompanisë, pesë pacientë me paralizë të rëndë aktualisht po përdorin pajisjen për të kontrolluar pajisje dixhitale dhe fizike vetëm përmes mendjes së tyre.
Administrata Amerikane e Ushqimit dhe Barnave (FDA) i ka dhënë pajisjes së Neuralink statusin e “pajisjes inovative” për dy funksione kyçe: restaurimin e të folurit dhe shikimit. Ky status mundëson një proces më të shpejtë për zhvillimin, testimin dhe shqyrtimin e pajisjeve mjekësore, për të siguruar akses më të shpejtë për pacientët dhe profesionistët e kujdesit shëndetësor.
Në të njëjtën kohë, Elon Musk, njeriu më i pasur në botë, ka deklaruar javën e kaluar se është tërhequr nga roli i këshilltarit special të ish-Presidentit amerikan Donald Trump, për t’iu rikthyer përqendrimit të plotë në drejtimin e kompanive të tij, përfshirë Tesla, SpaceX, xAI, Neuralink dhe rrjetin social X.
Raundi i fundit i financimit të Neuralink ka përfshirë investitorë të fuqishëm globalë, si:
ARK Invest, DFJ Growth, Founders Fund, G42, Human Capital, Lightspeed, QIA, Sequoia Capital, Thrive Capital, Valor Equity Partners dhe Vy Capital.
Sipas portalit Semafor, startup-i kishte siguruar fillimisht 600 milionë dollarë, në një marrëveshje që e vlerësonte kompaninë në 9 miliardë dollarë, përpara përfshirjes së kapitalit të ri.
