Gazeta New York Times raporton se emërimi i Delcy Rodríguez si presidente e përkohshme e Venezuelës nuk ka qenë i papritur për Uashingtonin dhe se administrata e Donald Trump kishte arritur një marrëveshje disa javë më parë për këtë skenar.
Sipas raportimit, pas arrestimit të Nicolás Maduro nga forcat amerikane, SHBA-të e shihnin Rodríguez si figurë më pragmatike dhe “të menaxhueshme”, veçanërisht për shkak të rolit të saj kyç në sektorin e energjisë dhe naftës. Uashingtoni vlerëson se ajo mund të garantojë mbrojtjen e interesave të kompanive amerikane dhe stabilitet minimal institucional gjatë tranzicionit.
Njohja nga ushtria dhe Gjykata Supreme
Vendimi u sanksionua publikisht nga kreu i Forcave të Armatosura dhe ministri i Mbrojtjes, Vladimir Padrino López, i cili deklaroi se ushtria njeh emërimin e Delcy Rodríguez në përputhje me vendimin e Gjykatës Supreme në Karakas. Gjykata e bazoi trashëgiminë në nenet 233 dhe 234 të Kushtetutës venezueliane, duke e formalizuar presidencën e përkohshme pas kapjes së Maduros.
Fjalimi i parë dhe thirrja për unitet
Në fjalimin e saj të parë, të transmetuar nga televizioni shtetëror VTV, Rodríguez bëri thirrje për unitet kombëtar, duke e cilësuar arrestimin e Maduros si “përdorim brutal force” dhe duke paralajmëruar se “ajo që iu bë Venezuelës mund t’i ndodhë çdo vendi”.
Kush është Delcy Rodríguez?
56-vjeçarja nga Karakasi është juriste, e diplomuar në Universitetin Qendror të Venezuelës, dhe një nga figurat më me ndikim të chavizmit për më shumë se dy dekada. Ajo ka shërbyer si ministre e Komunikimit, ministre e Jashtme, presidente e Asamblesë Kushtetuese Kombëtare dhe, që nga viti 2018, zëvendëspresidente e vendit. Deri në arrestimin e Maduros, ajo ishte edhe ministre e Naftës dhe autoriteti kryesor ekonomik i qeverisë.
Si diplomate, Rodríguez ka qenë një mbrojtëse e fortë e linjës së ashpër të Karakasit në arenën ndërkombëtare, duke kundërshtuar akuzat për shkelje të të drejtave të njeriut dhe duke përfaqësuar Venezuelën në OKB.
Vlerësimet e analistëve
Analistë kushtetues dhe politikë theksojnë se pozitat e shumta që ka mbajtur Rodríguez tregojnë ndikimin e saj të gjerë në aparatin shtetëror, përfshirë edhe lidhjet me sektorin e mbrojtjes—një faktor kyç në rrethanat aktuale.
Sipas New York Times, për SHBA-në ky tranzicion shihet si zgjidhje e përkohshme për stabilitet, ndërsa mbetet e paqartë se si do të zhvillohet procesi politik në Venezuelë dhe nëse do të çojë drejt zgjedhjeve të reja apo një riformatimi më të thellë të pushtetit.
