Një ish-DJ dhe organizata e tij jofitimprurëse “Hami Nepal” (Ne jemi Nepali) kanë luajtur rol kyç në rrëzimin e qeverisë së Nepalit dhe në emërimin e një udhëheqjeje të re të përkohshme. Duke përdorur platforma si Discord dhe Instagram, Sudan Gurung, 36 vjeç, mobilizoi dhjetëra mijëra të rinj në protesta që detyruan kryeministrin K.P. Sharma Oli të japë dorëheqje.
Protestat, të cilat nisën si thirrje kundër korrupsionit, u përhapën me shpejtësi pas ndalimit të rrjeteve sociale. Brenda pak orësh, demonstratat morën trajtë të dhunshme, duke rezultuar me 72 të vdekur dhe mbi 1,300 të plagosur – kriza më e rëndë politike që ka goditur Nepalit në dekada.
Nga rrugët në vendimmarrje
Grupi “Hami Nepal” përdori VPN për të shmangur bllokadat dhe për të shpërndarë thirrje për veprim. Postimet e tyre në rrjete sociale u bënë aq me ndikim, sa u transmetuan edhe në televizionin kombëtar.
Aktivistët arritën të bindin presidentin dhe shefin e ushtrisë që të emëronin Sushila Karkin, ish-kryetare e Gjykatës së Lartë dhe e njohur për qëndrimin e saj kundër korrupsionit, si kryeministren e parë grua në historinë e Nepalit – në një kapacitet të përkohshëm deri në zgjedhjet e 5 marsit.
“Do të sigurohem që pushteti t’i përkasë popullit dhe çdo politikan i korruptuar do të dalë para drejtësisë,” tha Gurung në konferencën e tij të parë për shtyp pas protestave.
Lëvizja “Gjenerata Z”
Shumica e protestuesve ishin të rinj në të 20-at, të cilët e quajtën veten “Gjenerata Z”. Megjithëse Gurung dhe ekipi i tij kanë refuzuar të marrin poste në qeveri, ata mbeten qendrorë në vendimmarrjen politike të ardhshme.
“Ne nuk duam të jemi politikanë. Jemi zëri i kombit, jo bartës të pushtetit,” deklaroi Ronesh Pradhan, një vullnetar 26-vjeçar i grupit.
Profili i liderëve të rinj
-
Sudan Gurung, ish-DJ, ka organizuar ndihmë humanitare gjatë tërmetit shkatërrimtar të vitit 2015 dhe pandemisë COVID-19.
-
Ojaswi Raj Thapa, 24 vjeç, pronar kafeneje, është bërë një nga figurat kryesore të protestave.
-
Rehan Raj Dangal, jurist i ri, është pjesë e ekipit që menaxhon rrjetet sociale të lëvizjes, ku numri i ndjekësve në Instagram ka arritur mbi 160,000.
Aktualisht, “Hami Nepal” është në negociata me Karkin për formimin e kabinetit të përkohshëm. “Procesi po zhvillohet me kujdes, në mënyrë që të përfshijë të rinj të aftë,” u tha në një postim të organizatës në Instagram.
