Një ngjarje e rëndë ka tronditur sot “Rrugën B” në Prishtinë, ku një burrë dyshohet se e ka sulmuar me thikë të dashurën e tij, duke i shkaktuar lëndime trupore, ndërsa më vonë është gjetur i vdekur në banesën e tij. Policia e Kosovës ka konfirmuar rastin dhe ka nisur hetimet për zbardhjen e plotë të rrethanave.
Ngjarja u raportua rreth orës 15:00, kur Policia dhe ekipet emergjente kanë intervenuar menjëherë në vendin e ngjarjes. Sipas deklaratës zyrtare, një mashkull 34-vjeçar u gjet pa shenja jete, ndërsa një femër 30-vjeçare u dërgua për trajtim mjekësor.
“Mbështetur në të dhënat fillestare, dyshohet se të dy personat kanë pësuar lëndime nga një mjet i mprehtë, dyshohet thikë,” bëri të ditur Policia.
Sipas raportimeve të portalit Sinjali, viktima e gjallë dhe personi i vdekur ishin në një marrëdhënie dashurie. I dyshuari, i identifikuar me inicialet F.I., dyshohet se e ka sulmuar të dashurën e tij me thikë dhe më pas është gjetur i vdekur në banesë. Rrethanat e vdekjes së tij janë ende të paqarta – nuk është konfirmuar nëse bëhet fjalë për vetëvrasje apo ndonjë shkak tjetër.
Në vendin e ngjarjes ndodhen forca të shtuara të Policisë dhe ekipe të Forenzikës, ndërsa hetuesit janë duke ndërmarrë të gjitha veprimet për zbardhjen e plotë të rastit. Autoritetet u kanë bërë thirrje qytetarëve për qetësi dhe bashkëpunim deri në përfundimin e hetimeve.
