Në ambientet e Kuvendi i Republikës së Kosovës kanë nisur sot homazhet në nderim të ish-kryetarit të Kuvendit, Nexhat Daci.
Homazhet po mbahen në praninë e familjarëve të të ndjerit, përfaqësuesve të institucioneve të Kosovës, bashkëpunëtorëve të tij ndër vite, si dhe qytetarëve të shumtë, të cilët po bëjnë nderimet e fundit për një nga figurat e rëndësishme të jetës institucionale të vendit.
Sipas agjendës zyrtare të ceremonive mortore, aktivitetet përkujtimore do të vazhdojnë gjatë ditës me Akademinë Përkujtimore, e cila do të mbahet nga ora 12:00 deri në 12:45, në Sallën Plenare të Kuvendit të Kosovës.
Ndërkohë, ceremonia e varrimit me nderime shtetërore është paraparë të zhvillohet nga ora 13:40 deri në 14:20, në Varrezat e Dragodanit, në Prishtinë.
Nexhat Daci ka mbajtur funksionin e kryetarit të Kuvendit të Kosovës në një periudhë kyçe të ndërtimit institucional të vendit dhe ka dhënë kontribut të rëndësishëm në jetën parlamentare dhe politike të Kosovës.
