Kryetari i NISMA Socialdemokrate, Fatmir Limaj, ka deklaruar mbështetjen e fuqishme të subjektit të tij politik për protestën e organizuar nga kategoritë e dala nga lufta, duke e cilësuar atë si një qëndresë legjitime në mbrojtje të vlerave të Ushtrisë Çlirimtare të Kosovës (UÇK).
“Në emrin tim dhe të NISMA Socialdemokrate, shprehim përkrahjen e plotë për protestën e organizuar nga kategoritë e dala nga lufta”, deklaroi Limaj. Ai shtoi se partia do të qëndrojë “krah për krah me organizatat që përfaqësojnë ata që kontribuan në luftën çlirimtare të Ushtrisë Çlirimtare të Kosovës”.
Sipas tij, UÇK-ja ka zhvilluar një luftë të drejtë dhe të pastër për lirinë dhe pavarësinë e Kosovës, dhe çdo përpjekje për të ruajtur këto vlera është detyrë e përbashkët. “Ne besojmë se e drejta është në anën tonë dhe se lufta e UÇK-së ka qenë e pastër, çlirimtare dhe thellësisht e drejtë”, theksoi Limaj.
NISMA Socialdemokrate theksoi përkushtimin për të qëndruar gjithmonë në mbështetje të përpjekjeve që synojnë ruajtjen e dinjitetit të luftëtarëve të lirisë dhe vlerave historike të luftës së UÇK-së.
