Kryeministri në detyrë, Albin Kurti, me të nisur mbledhjen e sotme tha se Qeveria e Kosovës e dënon sulmin ndaj zëvendësministrit në detyrë të Financave, Hysni Mehani, në Skenderaj.
Lëvizja Vetëvendosje më herët tha se Mehani u sulmua nga kryetari i Skenderajt, Sami Lushtaku.
“Hysni Mehani u sulmua me grushte dhe u godit në kokë me gotë teksa po pinte kafe me deputeten Arjeta Fejza dhe aktivistët tjerë. Qeveria e Kosovës e dënon këtë sulm qyqar e të papranueshëm që e shpërfaq mendësinë banditeske. Veprimet e tilla nuk na trembin e nuk na shtyjnë të tërhiqemi nga gara politike në asnjë qytet. U bëjmë thirrje institucioneve dhe organeve të rendit e drejtësisë që me urgjencë të marrin veprimet e nevojshme ndaj përgjegjësve për këtë sulm”, tha Kurti.
Për rastin reagoi edhe Lushtaku, i cili mohoi se e ka sulmuar duke thënë se qytetarët kanë reaguar pasi ai e kishte quajtur “Sami Serbia”.
Ndërkaq, ish-deputetja Fejza, e cila tha se kishte qenë duke pirë kafe me Mehanin kur ndodhi ky incident, tha se Mehani u sulmua nga Lushtaku, ndërsa aktivisti Bahri Zabeli “u sulmua nga grupi i Lushtakut”.
