Qeveria gjermane ka miratuar një projektreformë të thellë të sistemit të mirëqenies sociale, e cila do të ndikojë drejtpërdrejt edhe te mijëra bashkatdhetarë shqiptarë që jetojnë dhe punojnë në Gjermani, veçanërisht ata që janë të papunë ose në kërkim të punës.
Sipas raportimit të agjencisë gjermane të lajmeve dpa, ndryshimet prekin rreth 5.5 milionë përfitues të ndihmave sociale dhe synojnë të shtrëngojnë kriteret për marrjen e mbështetjes shtetërore.
Hiqen “paratë e qytetarëve”, futet ndihma bazë për punëkërkuesit
Reforma parasheh shfuqizimin e sistemit aktual të “parave të qytetarëve” (Bürgergeld) dhe zëvendësimin e tij me një model të ri të quajtur “ndihma bazë për punëkërkuesit”. Ky sistem vendos detyrime shumë më të rrepta për përfituesit dhe ka për qëllim të shtyjë më shumë njerëz drejt punësimit aktiv, duke ulur varësinë afatgjatë nga ndihmat shtetërore.
Ky propozim ka shkaktuar tashmë tensione brenda koalicionit qeverisës, mes konservatorëve të kancelarit Friedrich Merz dhe Social Demokratëve, sidomos rreth masave që mund të çojnë në humbjen e plotë të ndihmës sociale.
Ndërprerje automatike e pagesave dhe kushte më të ashpra
Një nga ndryshimet më të forta ka të bëjë me raportimin ndaj qendrave të punës (Jobcenter). Sipas rregullave të reja:
-
Ndihma ndërpritet automatikisht nëse përfituesi nuk paraqitet në tre intervista radhazi
-
Mund të hiqet edhe ndihma për strehim
-
Para vendimit final, parashihet një intervistë e detyrueshme, ndërsa personat me aftësi të kufizuara mendore do të kenë mbrojtje të veçantë
Më pak mbrojtje për kursimet dhe pasurinë
Reforma prek edhe mbrojtjen e aseteve personale. Për të përfituar ndihmë, aplikantët fillimisht do të duhet të përdorin:
-
të ardhurat personale
-
kursimet dhe pasurinë e tyre
Vetëm shuma të caktuara do të mbeten të mbrojtura, në varësi të moshës dhe rrethanave të jetesës, me përjashtime të kufizuara për kostot bazë të strehimit.
Çfarë do të thotë kjo për shqiptarët në Gjermani?
Për bashkatdhetarët shqiptarë, veçanërisht ata që janë në tranzicion pune, në sektorë të goditur nga kriza apo në kërkim aktiv të punës, kjo reformë nënkupton:
-
më pak tolerancë nga institucionet
-
më shumë përgjegjësi individuale
-
rrezik real për humbje të ndihmës në rast mosangazhimi aktiv
Mesazhi i qeverisë gjermane është i qartë: ndihma sociale nuk do të jetë më zgjidhje afatgjatë, por vetëm mbështetje e përkohshme për ata që tregojnë gatishmëri reale për punë.
Bashkatdhetarët këshillohen të informohen rregullisht pranë Jobcenter-it, të respektojnë takimet dhe procedurat dhe të ruajnë dokumentacionin përkatës, pasi shkeljet do të ndëshkohen më ashpër se më parë.
