OBSH ka paralajmëruar se fenomeni i ashtuquajtur “shi i zi” dhe përhapja e substancave toksike në atmosferën e Iran mund të shkaktojnë probleme serioze shëndetësore për popullsinë, veçanërisht për sistemin respirator.
Sipas OBSH-së, gjatë kësaj jave janë raportuar reshje shiu të përziera me mbetje nafte në Tehran, pas sulmeve ndaj instalimeve dhe rafinerive të naftës.
Të hënën, kryeqyteti iranian u mbulua nga re të dendura tymi të zi pasi një rafineri nafte u bombardua, në kuadër të përshkallëzimit të sulmeve ndaj infrastrukturës energjetike të vendit.
Zëdhënësi i OBSH-së, Christian Lindmeier, deklaroi gjatë një konference për shtyp në Gjenevë se situata paraqet rrezik real për shëndetin publik.
“Shiu i zi dhe shiu acid që e shoqëron përbëjnë vërtet një rrezik për popullsinë, sidomos për sistemin respirator”, tha ai.
Rekomandohet që qytetarët të qëndrojnë brenda
Autoritetet iraniane kanë rekomanduar që qytetarët të qëndrojnë në ambiente të mbyllura, një masë që OBSH e konsideron të arsyeshme në kushtet aktuale.
Sipas Lindmeier, bombardimet kanë çliruar në atmosferë hidrokarbure toksike, okside squfuri dhe përbërje azotike, të cilat ndikojnë drejtpërdrejt në cilësinë e ajrit.
Ekspertët paralajmërojnë se ekspozimi ndaj këtyre substancave mund të shkaktojë dhimbje koke, irritim të syve dhe lëkurës, si dhe vështirësi në frymëmarrje, ndërsa ekspozimi afatgjatë mund të rrisë rrezikun për zhvillimin e disa llojeve të kancerit.