Përfaqësues të pesë organizatave të mëdha të biznesit në Kosovë kanë kërkuar sot me ngulm anulimin e vendimit të Zyrës së Rregullatorit për Energji (ZRRE) për liberalizimin e tregut të energjisë elektrike. Në një takim të përbashkët me bizneset e prekura nga ky vendim, Oda Ekonomike e Kosovës, Oda Ekonomike Amerikane, Oda Ekonomike Gjermano-Kosovare, Klubi i Biznesit dhe Dhoma e Tregtisë dhe Industrisë e cilësuan vendimin si të papërballueshëm dhe me pasoja të rënda për sektorin privat.
Kryetari i Odës Ekonomike të Kosovës, Lulzim Rafuna, deklaroi se vendimi është i nxituar dhe i dëmshëm për ndërmarrjet që nuk kanë pasur kohën dhe përgatitjen e nevojshme për të hyrë në një treg të lirë. “Bizneset nuk janë përgatitur për një treg të lirë të energjisë. Ky vendim rrezikon qëndrueshmërinë financiare të shumë kompanive,” tha Rafuna.
Në të njëjtën linjë u shpreh edhe drejtori i Klubit të Biznesit, Ilir Ibrahimi, i cili theksoi se ndikimi financiar është i jashtëzakonshëm dhe mund të rezultojë në mbyllje të bizneseve. “Ky është një vendim i rëndë, të cilit asnjë biznes nuk mund t’i mbijetojë në këtë formë,” tha ai.
Përfaqësuesit e komunitetit të biznesit kërkuan që vendimi të anulohet sa më parë. Si alternativë, në rast se anulimi nuk ndodh, ata kërkojnë që shteti të subvencionojë kostot shtesë që do të shkaktojë ky sistem i ri energjetik. Në të kundërt, paralajmëruan se do të shprehin pakënaqësinë përmes formave të tjera të reagimit, përfshirë protestat.
Odat theksojnë se për një reformë kaq të ndjeshme duhet më shumë përgatitje, transparencë dhe përfshirje e drejtpërdrejtë e sektorit privat në procesin vendimmarrës.
