Interesi i vendeve anëtare të Bashkimit Evropian për të përfituar nga programi i mbrojtjes SAFE, i propozuar nga Komisioni Evropian, ka tejkaluar ndjeshëm fondin e paraparë prej 150 miliardë euro. Sipas burimeve të “Euractiv”, kërkesat për kredi nga 18 shtete anëtare kapin vlerën shumë më të lartë sesa buxheti në dispozicion.
Të dhënat fillestare flasin për një total prej 127 miliardë euro interes zyrtar, mirëpo kjo shifër përfaqëson vetëm ofertat minimale. Vendet pjesëmarrëse kanë paraqitur edhe oferta maksimale, të cilat e çojnë vlerën përfundimtare shumë përtej kufirit të planifikuar.
Një burim i afërt me zhvillimet konfirmoi për “Euractiv” se kërkesat janë “shumë mbi” kapacitetin prej 150 miliardë euro të zarfit financiar të programit SAFE, siç ishte raportuar fillimisht nga “Firepower”.
Programi SAFE, i prezantuar nga Komisioni Evropian në mars 2025, synon të nxisë industrinë e mbrojtjes në BE, duke rritur prodhimin e pajisjeve dhe municioneve ushtarake, si dhe për të rimbushur rezervat ushtarake të kontinentit. Megjithatë, për shkak të kufizimit buxhetor, Komisioni do të duhet të përcaktojë kritere të rrepta për shpërndarjen e fondeve mes aplikuesve.
Në një përpjekje për ta bërë programin më gjithëpërfshirës, ekzekutivi evropian po vazhdon të ftojë shtetet që ende nuk kanë aplikuar. Një letër e dërguar javën e kaluar ka inkurajuar nëntë vende anëtare që të paraqesin kërkesat e tyre gjatë verës, përpara afatit zyrtar që është fundi i nëntorit.
Sipas Komisionit, çdo shtet duhet të hartojë një plan të detajuar me shumën minimale dhe maksimale të kërkuar, si dhe të specifikojë llojin e pajisjeve që synon të blejë përmes programit SAFE. Kjo do të ndihmojë në procesin e vlerësimit dhe ndarjes së fondeve në përputhje me prioritetet strategjike të mbrojtjes së Bashkimit Evropian.
